ബിഡികെയും, എം.സി.വൈ.എം. ഉം സംയുക്തമായി രക്തദാനക്യാമ്പ് സംഘടിപ്പിച്ചു.

കുവൈത്ത് സിറ്റി: ബ്ലഡ് ഡോണേഴ്സ് കേരള, കുവൈത്ത് ചാപ്റ്റർ എം.സി.വൈ.എം. കുവൈത്ത് -ന്റെ പങ്കാളിത്തത്തോടെ ജൂലൈ 26, വെള്ളിയാഴ്ച ഉച്ചയ്ക്ക് 1 മണി മുതൽ വൈകുന്നേരം 5 മണി വരെ,  ജാബ്രിയ സെൻട്രൽ ബ്ലഡ് ബാങ്കിൽ വച്ച് രക്തദാനക്യാമ്പ് സംഘടിപ്പിച്ചു. 2019 വർഷത്തിൽ പ്രതിമാസം കുറഞ്ഞത് ഒരു ക്യാമ്പ് എന്ന നിലയിൽ ബിഡികെ കുവൈത്ത് ചാപ്റ്റർ വിവിധ സംഘടനകളുടേയും, സ്ഥാപനങ്ങളുടേയും സഹകരണത്തോടെ സംഘടിപ്പിക്കുന്ന ഈ വർഷത്തെ 12മത്തെയും, എം.സി.വൈ.എം. നോടൊപ്പമുള്ള രണ്ടാമത്തെയും രക്തദാനക്യാമ്പ് ആണ് കഴിഞ്ഞ ദിവസം നടന്നത്. ക്യാമ്പുകളോടൊപ്പം തന്നെ കുവൈത്തിലെ ആശുപത്രികളിൽ ചികിത്സയിൽ കഴിയുന്ന രോഗികൾക്കായി അടിയന്തിരഘട്ടങ്ങളിൽ ആവശ്യമായ രക്തവും ബിഡികെ കുവൈറ്റ് പ്രവർത്തകർ എത്തിച്ചുനൽകുന്നുണ്ട്. കുവൈറ്റ്‌ മലങ്കര റൈറ്റ് മൂവ്മെന്റ് (കെ. എം. ആർ. എം.) ന്റെ യുവജന വിഭാഗമായ എം.സി.വൈ.എം. ന്റെ പ്രതിമാസ സാമൂഹ്യസേവന പ്രവർത്തനങ്ങളുടെ ഭാഗമായാണ് പ്രവർത്തകർ രക്തദാനം നടത്തിയത്. കടുത്ത ചൂടും, പൊടിക്കാറ്റും ഉൾപ്പെയെയുള്ള പ്രതികൂല കാലാവസ്ഥയിലും 75 ഓളം പേർ ക്യാമ്പിൽ രക്തദാനം നടത്തി.

ക്യാമ്പിന്റെ ഔപചാരിക ഉദ്ഘാടനം റവ. ഫാദർ മാത്യു നരിയാട്ടിൽ നിർവഹിച്ചു. കെ. എം. ആർ. എം. വൈസ് പ്രസിഡണ്ട് ഷിബു ചെറിയാൻ,  എം.സി.വൈ.എം. കൺവീനർ ലിൻസ് ജോൺ, ബിഡികെ പ്രവർത്തകരായ രാജൻ തോട്ടത്തിൽ, രഘുബാൽ, രഞ്ജിത് രാജ് എന്നിവർ രക്തദാതാക്കൾക്ക് ആശംസകൾ അർപ്പിച്ചു.

സമൂഹത്തിൽ സന്നദ്ധ രക്തദാനത്തിന്റെ പ്രാധാന്യം പ്രചരിപ്പിക്കുക എന്ന ലക്ഷ്യത്തോടെ കേരളം ആസ്ഥാനമായി പ്രവർത്തിക്കുന്ന നവമാധ്യമ കൂട്ടായ്മയായ ബ്ലഡ് ഡോണേഴ്സ് കേരള, കുവൈത്ത് ഉൾപ്പെടെ പത്തോളം രാജ്യങ്ങളിൽ സജീവമാണ്.